EFEverde.- A Plataforma Sarriana polo Río, que se opón ao proxecto de condución do río Sarria ao seu paso por esa localidade, acusa o alcalde dese municipio lugués, José Antonio García, de intentar que a Subdelegación do Goberno prohibise unha manifestación convocada polo colectivo para este venres, día 24 de outubro.
Nun comunicado, a plataforma, que convocou unha cazarolada para protestar pola execución do proxecto, asegura que o alcalde remitiu “un escrito á Subdelegación do Goberno” para expresar a súa oposición a esa manifestación contra o proxecto de condución, que está executando a Confederación Hidrográfica Miño-Sil.
“Finalmente, ese escrito foi desestimado polo subdelegado -Ramón Carballo-, que acaba de autorizar a referida manifestación”, precisa a plataforma, quen tamén asegura que “o da liberdade de reunión e o da liberdade de expresión son conceptos estraños para o señor alcalde de Sarria”.
Na mesma liña, este colectivo afirma que o alcalde de Sarria e o presidente da CHMS “non dubidan en recorrer até a ameaza para desincentivar a participación dos cidadáns libres na vida pública”. EFEverde
