O centro tecnolóxico Aimen inaugurou hoxe oficialmente o seu novo centro de aplicacións láser entre reproches do seu presidente, Fernando Vázquez, polos recortes orzamentarios en I+D+i no último lustro.
Ante o presidente da Xunta, Alberto Núñez Feijóo, e a secretaria de Estado de Investigación, Desenvolvemento e Innovación, Carmen Vela, Vázquez preguntouse “como pode ser” que nos últimos cinco anos se reducise o financiamento en 50%.
O presidente da Aimen receitou investir en tecnoloxía que dea pé a proxectos de investigación que permitan a España “competir en Europa” mediante a transferencia do coñecemento á industria.
Falou de “carencias moi graves” en formación e remarcou que antes que atraer tecnólogos galegos ou españois que están traballando no estranxeiro, “o máis importante é evitar que se vaian”.
Vázquez incidiu no custo económico de recuperar persoal cualificado que encontrou unha saída laboral noutros países e en que, co investimento adecuado, por exemplo Aimen podería formar en cinco anos a entre 50 e 100 enxeñeiros “altamente cualificados”.
Tecnoloxía láser
Agradeceu o apoio das administracións para poder inaugurar hoxe “o centro máis importante de tecnoloxía láser de España” -a Xunta achegou 1,5 millóns e o Goberno, 5,5 a través de fondos Feder-, mais reclamou que “oian máis” os centros tecnolóxicos, “que non sexa froito dun día”.
A súa idea é que estes centros teñan “unha participación máis activa” no proceso de revitalización da industria galega, que durante os anos de crise estivo “paralizada, case durmida”.
O presidente da Xunta, Alberto Núñez Feijóo, replicoulle ratificando “o compromiso” das administracións central e autonómica cos centros tecnolóxicos e a súa “aposta clara” pola I+D+i, que é, dixo, “un dos motores para acelerar o crecemento económico”.
Lembrou que en seis anos se ampliaron as instalacións de case todos os centros tecnolóxicos de Galicia e que a Comunidade Autónoma xa ten planificadas as súas prioridades de investimento a través da estratexia de especialización intelixente RIS3 para poder “competir co resto do mundo”.
Feijóo tamén subliñou que para conseguir cofinanciamento do Goberno e da UE para proxectos de innovación fai falta “solvencia” nas contas públicas, e que grazas a un “esforzo sostido” dos últimos anos Galicia é unha das comunidades autónomas de que o Goberno “se pode fiar”.
Igualmente, defendeu o modelo de “cooperación en rede” entre centros tecnolóxicos, universidades e empresas, que require, dixo, “talento”, transferencia de coñecemento á industria e “un uso eficiente” dos recursos públicos.
Entre tanto, Carmen Vela apostilou que “o talento tamén pode vir de fóra” e que “non pasa nada” porque haxa unha “circulación” de persoal cualificado dentro e fóra do país.
“Se temos persoas capacitadas, temos tamén a obriga de formalas e darlles acomodo”, aseverou a secretaria de Estado, que sinalou que no Goberno están “facendo cousas” por mellorar a competitividade das empresas, “non só lles falamos e os animamos e dicímoslles que está difícil”.
I+D+i
Vela confiou en que nos próximos orzamentos xerais do Estado aumenten as partidas en I+D+i e remitiuse ás palabras do presidente Mariano Rajoy no referente a que a melloría económica revelará “as capacidades e o interese” do Goberno pola ciencia.
Máis alá do financiamento, resaltou outras medidas do Executivo como os visados científicos, as bonificacións da Seguridade Social para investigadores, ou desgravacións do imposto de sociedades.
Sobre o novo centro de aplicacións láser da Aimen, dixo que é “unha referencia a nivel internacional”, que nace coa vontade de “chegar lonxe”, onde “predomina o talento” e fai “innovación da mellor calidade”, e que servirá para “pór a ciencia española no lugar que merece”. EFEverde
