EFEverde.- Investigadores da Facultade de Ciencias do Mar da Universidade de Vigo e do Instituto Español de Oceanografía (IEO) publicaron un traballo en que mostran o recente descubrimento dunha nova especie de cangrexo ermitán, que localizaron nas augas profundas de Mauritania.
O artigo, asinado pola investigadora Susana S. de Matos e o profesor Fran Ramil, foi publicado na revista Zootaxa, onde os científicos deixan constancia da súa intención de continuar “descubrindo novas especies” na zona.
Tres exemplares do Paguristes candelae, como designaron o crustáceo en honra á filla de ambos os investigadores, Candela, están actualmente expostos no Museo Nacional de Ciencias Naturais de Madrid, onde se ofrece unha detallada descrición da nova especie.
Ramil explica, nunhas declaracións difundidas pola universidade, que entre os cangrexos ermitáns que recolleron ao longo das catro campañas oceanográficas que realizaron en Mauritania, desde 2007 até 2010, puideron identificar 13 especies diferentes, das que unha resultou ser “nova para a ciencia”.
Estas especies foron recollidas en 83 das 316 estacións de arrastre realizadas na plataforma profunda e na marxe continental do país africano durante as citadas campañas. EFEverde
