A Consellaría de Medio Rural e do Mar utilizou un avión e submarinos non tripulados nun simulacro sobre verteduras contaminantes no litoral, en que se empregaron un dron aéreo e dous submarinos non tripulados.
O simulacro de “accidente ambiental marítimo” foi observado pola titular do departamento, Rosa Quintana, en augas do porto da Pobra do Caramiñal, informou a Xunta nun comunicado.
Na operación, inscrita no proxecto europeo Netmar, de prevención contra a contaminación marítima, participaron unha ducia de embarcacións e máis de sesenta tripulantes co obxectivo de probar o funcionamento de equipamentos técnicos e humanos de resposta a posibles verteduras contaminantes no litoral.
O simulacro consistiu nunha suposta vertedura de amoníaco no porto, con dispersión da mancha cara á ría de Arousa, e a tarefa dos equipos de intervención centrouse na detección, seguimento permanente da dispersión da vertedura, recuperación e tratamento do líquido.
Entre o material utilizado, ademais do dron aéreo e de dous submarinos de metro e medio de eslora, todos eles non tripulados, figuraba tamén un robot que permitiu inspeccionar o buque “accidentado”.
No operativo realizouse, ademais, un seguimento desde diversas cámaras que enviaban información en directo a unha plataforma de control interno.
Ademais da Consellaría, no simulacro participaron expertos da Universidade de Vigo, Capitanía Marítima de Vilagarcía, Sasemar, Garda Civil do Mar, a Confraría de Mariñeiros da Pobra, asociacións de mexilloeiros e Protección Civil.
Tras a proba, a conselleira de Medio Rural e do Mar explicou que se trata da continuidade do simulacro realizado o ano pasado por Netmar en Irlanda e sinalou que permitiu “coñecer na práctica as fortalezas e debilidades dos nosos equipos e a capacidade de resposta coordinada das operacións en terra e mar dos operativos de loita contra a contaminación nas nosas costas”. EFEverde
