O mapa é un «gran compilador de información e un elemento necesario na vida humana» que permite coñecer a cada persoa o seu territorio e o dos demais, sostivo González Pérez durante a inauguración da mostra.
«Esta exposición recolle unha mínima parte da enorme colección que conserva nos seus fondos o museo, porque neste caso o que se buscaba era mostrar Galicia como unha unidade diferenciada», comenta o mestre, etnógrafo e patrón do Museo do Pobo Galego.
Por súa vez, a directora da Fundación, Laura Rodríguez Herrera, explicou que na actualidade a cartografía é moito máis que a mostra gráfica dun territorio e os seus compoñentes, pois supón o que define a identidade dun pobo, a base sobre o que se constrúe.
A exposición comeza co mapa de Fernando Ojea, que é o primeiro no que aparece Galicia como espazo diferenciado, e a partir desta peza desenvólvense outros modelos mellorados e máis coutados á realidade xeográfica.
Os primeiros mapas realizábanse de acordo coa información reflectida en cartas náuticas e non se levaba a cabo unha investigación previa.
A mostra permanecerá aberta ao público desde hoxe até o vindeiro 16 de maio, de luns a venres na sede da Fundación Rodríguez Iglesias da Coruña. EFEverde
