O compromiso rubricado na Casa de Cultura do municipio de Xinzo de Limia concirne o proxecto «Life Rexenera Limia», aprobado pola Comisión Europea en abril pasado entre 1.500 candidaturas.
O protocolo foi asinado polo presidente da Confederación Hidrográfica Miño Sil, Francisco Marín; a directora xeral de Conservación da Natureza da Xunta, Verónica Tellado; o presidente da Deputación de Ourense, Manuel Baltar.
Un técnico precisou que o obxectivo do proxecto é frear a contaminación na bisbarra ourensá da Limia e reducir a elevada «presenza de nutrientes», na súa maioría procedentes da actividade agrogandeira, mediante a posta en marcha dunha batería de iniciativas de carácter preventivo e de rexeneración de espazos fluviais.
O proxecto «Life Rexenera Limia» ten como principal obxectivo aplicar unha serie de técnicas innovadoras que reducirán a presenza de nutrientes, fundamentalmente de orixe agrogandeira, nas masas de auga da bisbarra.
Inclúe 26 medidas agrupadas en tres fases ata xuño de 2017: unha de elaboración de proxecto, outra de execución e unha terceira de monitorización e seguimento deste.
Para iso, Medio Ambiente prevé pór un sistema de control de fertilizantes e de aboamentos en cultivos xunto a lagoas artificiais, con tratamento de augas residuais procedentes de xurros canda a rehabilitación de vías fluviais e integración no ciclo hidrolóxico de charcas de antigas explotacións mineiras para recuperar espazos húmidos.
A intención é reducir a presenza de nutrientes nas masas de auga da bisbarra, mediante ensaio de técnicas verdes que axuden na depuración de xurros e a rexeneración dos ecosistemas asociados ao río Limia.
Marín espera que «quede marcado o camiño que hai que seguir» para solucionar o problema no río, que favorece a aparición de cianobacterias no encoro das Conchas.
Nesta liña, Tellado resaltou que se trata dunha «ambiciosa iniciativa» para favorecer a rexeneración ambiental mediante «técnicas non agresivas para reducir a presenza de nutrientes».
Ademais, concluíu que «coas melloras no saneamento de Xinzo e as distintas medidas que prevé o proxecto Life Rexenera Limia, o río terá «un mellor futuro».
O proxecto será «un paso máis, pero non o último», proclamou Baltar.
«Unha vez superada esta fase demostrativa estou convencido de que, entre todos, iniciamos o camiño correcto de cara a conseguir que na futura revisión dos plans hidrolóxicos, prevista para 2021, esta masa de auga cumpra cos obxectivos ambientais e poida alcanzar a catalogación de bo estado», concluíu Marín.
Este proxecto súmase ao presentado hai aproximadamente un mes de mellora da depuradora da Limia, coa que esperan reducir o problema de cianobacterias do encoro das Conchas. EFEverde
