A SGHN critica a xestión da caza de paspallás na Limia

Os ecoloxistas denuncian nun comunicado que a Dirección Xeral de Conservación da Natureza non respondeu ao escrito que lle enviou sobre a caza desta especie na época estival.

En contra da información difundida pola unión de tecores de Galicia, Unitega, a SGHN informou de que tivo acceso a datos dalgúns dos aproveitamentos en que a media de capturas era aínda inferior á baixa media alcanzada na pasada tempada.

Tamén subliña que os datos recollidos nestes días indican que o paspallás se encontra en plena tempada de cría na Limia, con pitos acabados de nacer e que aínda non poden voar.

Por iso, demanda da Administración os datos de capturas na zona nas últimas fins de semana de agosto, información sobre os medios de control para saber que os datos dos tecores son reais e que se tomen medidas en función desta información, de maneira que, se for o caso, se suspenda definitivamente esta actividade estival ou se atrase até a segunda quincena de setembro. EFEverde