Estes procesos destinados a eliminar contaminantes na auga utilizan, entre outros sistemas, microalgas e bacterias que axudan a que un medio natural alterado volva ao seu estado inicial.
Jesús Torres, profesor do Departamento de Física Aplicada da Universidade de Vigo e coordinador de Bioauga, explicou que o obxectivo principal desta iniciativa é «sumar estratexias» para avanzar nos procesos de biorremediación dos recursos hídricos con tecnoloxías que sexan transferibles ao sector industrial.
Deste xeito, producirase un uso «máis eficiente» dos recursos e asegurarase a integridade do medio natural e a biodiversidade como un «factor de competitividade e de desenvolvemento socioeconómico do país», destaca Torres.
En paralelo a esta meta de transferir metodoloxías ao sector industrial de Galicia, Bioauga prevé outros obxectivos que seguen a liña marcada pola Estratexia de Lisboa e que conteñen un enfoque orientado cara ao coñecemento e á innovación desde o punto de vista da sostibilidade e a eficiencia enerxética.
Para conseguir estes fins, o proxecto estimula o espírito innovador e fomenta o coñecemento multidisciplinar no campo da biorremediación mediante novas tecnoloxías e metodoloxías desenvolvidas noutros campos.
Cunha media de oito a dez investigadores por cada grupo de traballo, Bioauga súmase a outras iniciativas xa existentes con similares obxectivos no ámbito nacional e internacional e coas que prevé contactar para cooperar de cara ao programa europeo Horizonte 2020. EFEverde
