Prohíbese o paso de camións no Poio por causa da neve

Neste punto tamén se recomenda precaución aos condutores de turismos, aínda que por agora non é preciso o uso de cadeas.

A prohibición de paso para camións e vehículos pesados, así como a recomendación de precaución, afecta o tramo comprendido entre o quilómetro 0 e o 13 da estrada autonómica LU-633, no termo municipal de Pedrafita.

Fontes do subsector da Garda Civil de Tráfico de Lugo confirmaron que polo resto de vías principais se pode circular con relativa normalidade.

En varios puntos da autovía do Noroeste (A-6) ao seu paso pola Montaña de Lugo e no alto do Fiúco, neste caso na autovía do Cantábrico (A-8) en Mondoñedo, estivo nevando nestas primeiras horas da mañá, nalgúns momentos con intensidade, mais non chegou a afectar a circulación polo traballo das máquinas quitaneves.

Hai problemas para circular, non obstante, por varias estradas da rede viaria provincial, que depende da Deputación de Lugo, concretamente en municipios como Pedrafita do Cebreiro, Triacastela e O Courel. EFEverde