EFEverde.- A Comisión Sectorial do Cerco, que tivo lugar hoxe, finalizou coa intención firme de aceptar a proposta presentada pola Asociación de Armadores de Cerco de Galicia (Acerga), consistente na fixación dun tope de capturas de xurelo de 6.000 quilos por barco e día, coa que se incrementaría o prezo da especie.
Na reunión que tivo lugar na Consellaría de Medio Rural e Mar, todos os axentes implicados consideraron positiva esta proposta que posibilita unha mellora no sistema de comercialización do xurelo.
O presidente da Federación Galega de Confrarías de Mariñeiros, Tomás Fajardo, considerou “interesante” esta idea, que asignaría aos barcos de máis de dez tripulantes unha cota máxima de 6.000 quilos, e, aos de menos dunha decena, unha cota entre 5.000 e 5.500 quilos.
Fajardo, á súa saída da comisión, que se prolongou durante case tres horas, avanzou que a Federación realizará unha “consulta” a todas as confrarías para decidir de forma democrática se finalmente apoian esta iniciativa.
A decisión, previsiblemente, coñecerase na próxima comisión sectorial do cerco, que terá lugar o vindeiro venres e en que ademais tamén participará o sector do arrastre, que tamén pesca xurelo e nos mesmos caladoiros.
Fajardo sinalou que espera que esta idea se leve a cabo, xa que este máximo de descargas axudará a “mellorar a venda final”, é dicir, o prezo da especie no mercado.
Ademais, este plan tamén incluiría a decisión de adoptar un período dun mes ao ano de parada biolóxica, entre os meses de “decembro e marzo”, para mellorar a situación do “stock” de capturas.
Andrés García, voceiro de Acerga, que representa 115 das 156 embarcacións que traballan na Comunidade galega e arredor do 80 % do sector, tamén valorou a postura da Federación de Confrarías, ante cuxo directivo sinalou que espera que se poñan de acordo.
“Por parte do cerco esta proposta vai frutificar”, manifestou García.
Con ela búscase unha mellora no prezo de mercado, (“algo subirá”, admitiu), a pesar de que esta suba non sexa demasiado notable, pero de todos xeitos “o mercado fresco non tira, pero algo subirá”.
Mellora do sector
Para os membros de Acerga este acordo supón “un paso” para a mellora do sector, pero lamentan, segundo as impresións trasladadas tras a reunión, que os barcos máis grandes non vaian ceder ante a proposta dun reparto lineal, por tripulantes e non por capturas históricas.
García comentou que “algún deixou claro que dicía que si ao tope pero non a pór a súa cota a disposición dunha xestión conxunta”.
Con esta fixación de cotas, García insistiu en que “algún paso” se dá, pero, de todos os xeitos, a cota non chegará para todo o ano.
A conselleira de Medio Rural e Mar, Rosa Quintana, tamén se mostrou “satisfeita” co resultado do encontro, en que puido verse que o sector volve traballar “unido” co obxectivo de mellorar a rendibilidade na comercialización das súas capturas.
“Estiveron propondo temas de presente e tamén de futuro”, concretou. EFEverde
Debe estar conectado para enviar un comentario.