Dispositivo contra incendios
Vázquez explicou que, a pesar de que o operativo inicial parte con máis de 7.000 efectivos, 360 motobombas e un bo número de medios aéreos, estes poden incrementarse ata en «cincuenta brigadas máis das que actualmente» se deron a coñecer se se dan condicións de «moito risco».
«Cremos que así –co dispositivo inicial– temos perfectamente cuberto o territorio», abundou a conselleira, que explicou que existen convenios de colaboración con varias Administracións para axilizar a mobilización de recursos.
Na súa intervención, a responsable de Medio Rural do Executivo autonómico tamén abordou a actualización do Plan de Prevención e Defensa contra os Incendios Forestais en Galicia (Pladiga), que este ano se caracteriza por unha maior presenza de medios tecnolóxicos, para a geolocalización «de todo o persoal e todo o operativo», de modo que poidan mellorarse as súas condicións loxísticas e de seguridade.
«A loita é a de sempre. Erradicar na medida do posible os incendios», sentenciou Vázquez, que para iso insistiu en «pedir a colaboración» de todos os axentes sociais e «lembrar as obrigacións» de cada un deles en materia de prevención para combater este «problema de todos».
Así pois, emprazou a particulares, propietarios, concellos, deputacións, Xunta e Estado a colaborar e a esforzarse para «ser capaces de previr» a propagación dos incendios.
«Tempada máis crítica de incendios»
En representación do Goberno galego tamén estivo presente na reunión do CIPIG o vicepresidente da Xunta, Alfonso Rueda, que definiu o encontro como a «constatación formal» de que «todo está disposto» para facer fronte á «tempada máis crítica de incendios».
Aos obxectivos enumerados polo Pladiga, que se basean en reducir ao máximo posible o número de incendios forestais e o calado das súas consecuencias, Rueda sumou un terceiro, que é «conseguir a máxima eficacia policial na investigación, detención e posta a disposición da xustiza dos incendiarios», algo que cre que cada vez funciona mellor.
En representación do Estado, acudiron á reunión do CIPIG tanto o subsecretario do Ministerio de Interior, Luís Aguilera; como o delegado do Goberno en Galicia, Santiago Villanueva.
Durante o seu discurso, Aguilera considerou que o CIPIG é «un exemplo modélico de colaboración e complementariedade na loita contra os incendios forestais» e que, aínda que a maioría de competencias neste tema sexan autonómicas, o Estado debe actuar reforzando todos os dispositivos.
O subsecretario de Interior advertiu ademais de que, tras un inverno «especialmente seco» e unha primavera «máis seca do normal» en Galicia, as previsións para o verán son que «as temperaturas medias sexan lixeiramente superiores» e escaseza de precipitacións, polo que haberá que estar «especialmente vixiantes» e «ter todos os medios dispostos».
Neste sentido, sinalou que a esta altura xa houbo sete incendios de relevancia en España polos dous do ano pasado, ademais do «desgraciadísimo caso» de Pedrógão Grande, en Portugal, onde faleceron máis de 60 persoas a causa do lume.
Aguilera enumerou tamén os recursos que o Estado achega ao dispositivo contra incendios en Galicia, que inclúen varios avións e mesmo drons para o seguimento, a través de infravermellos, dos lumes durante a noite.
Finalmente, o delegado do Goberno en Galicia, Santiago Villanueva, afirmou que «se vai a prestar toda a atención por parte da Policía» á persecución dos incendiarios e apuntou que se incrementa tamén «a presenza no medio de cabalería», da que en anos anteriores había catro escuadras. Efeverde
