EFEverde.- A organización ecoloxista Adega informou de que o Tribunal Superior de Xustiza de Galicia (TSXG) acaba de ditar unha sentenza en que “condena a Confederación Hidrográfica Miño-Sil (CHMS) a actuar contra varias agresións denunciadas” por este colectivo que afectaron o tramo alto do río Rato, en Lugo capital.
Adega lembra nun comunicado que en 2010 denunciou recheos de terras, verteduras e perdas de caudal en varios lugares da leito alto do río Rato, entre o polígono do Ceao e a ponte nova de Paradai.
Recheos
Parte deses recheos, sostén a organización, supuxeron “a acumulación de miles de toneladas de terra e cascallos nas marxes do río Rato”, mentres que as perdas de caudal para os colectores de saneamento que hai nesa parte da vía, agora en desuso, “comprometen a subsistencia” das especies que habitan nese tramo, especialmente na época estival.
Porén, Adega afirma que “sorprendentemente, a denuncia foi arquivada en febreiro de 2012 pola CHMS”, cando era presidida por Francisco Fernández Liñares, “achacando as perdas de caudal a causas naturais e negando a propia existencia” dos citados recheos.
Por iso, “ante o insólito dos feitos”, Adega tivo “que recorrer aos tribunais”.
“Durante o proceso xudicial, a Confederación tentou xustificar a falta de actuación contra varias agresións, nuns casos co pretexto de descoñecer os infractores e noutros negando a existencia dos tramos de río afectados”, precisou.
Por iso, expresou “a súa satisfacción pola sentenza xudicial”, aínda que “considera abusivo que as administracións públicas, neste caso a Confederación, continúen desatendendo as súas funcións e obrigando unha asociación de escasos recursos económicos e sen ánimo de lucro a acudir aos tribunais para defender un ben público, o río Rato, de agresións tan groseiras e indiscutibles”. EFEverde
